کوچنیان مو په فکري ارامتیا او سوله کې و روزئ

پوهنتون ویب پاڼه

د جنګ ځپلو او وروسته پاته هیوادونو ځوانان د فکري نارامۍ او ذهني ترنګیلتایوو کې ښکیل وي. دا هغه حالت دی چې ځوانان نشي کولی خپل راتلونکي لپاره تل پاته پلان ولري او د یاد پلان عملي کولو لپاره کوټلي ګامونه پورته کړي. فکري نارامه ځوانان هره ورځ د یو نوي فکر سره او یا ډیری وخت له نورو خوا په ورکړل شوي فکر پیل او د ورځې پای پرته د څه لاسته راوړنې تیروي.

دا ځورونکی حالت هغه څه دي چې د وروسته پاتې ټولنې ځوانان تل د بې لارې کسانو، وروسته پاتې فکرونو او همدا ډول د پردیو شومو موخو ښکار ګرځي. د دې لپاره چې ځوانان مو کوټلي، خپلواک او د روغ فکر څښتن ووسي، اړینه ده چې له کوچنیوالي په سوله ایز او روغ فکر وروزل شي.

د کوچنیانو د فکري سولې او ثبات روزنه په لاندې کارونو ترسره کولی شئ او دا کار باید له همدا نن نه پیل کړئ:

1. کوچنیانو ته په خپل کور کې د مینې او صمیمیت چاپیریال را جوړ کړئ. ستاسي کوچنیان ستاسي لخوا د توانمندۍ، مرستندویه چاپیریال ته اړتیا لري چیرې چې هغوي مینه، خوندیتوب او خپل ارزښت احساس کړي. هغه کوچنیان چې مینه ورکول کیږي او ځان خوندي احساسوي، هغه په راتلونکي کې د فکري سولې او ثبات ښه څښتن ګرځیدای شي.
2. کوچنیانو ته مو د عمر سره سم د جسمي او عصبي ارامښت تمرین ور زده کړئ. له دې لارې به کوچنیان په راتلونکې کې د خپل فکر او احساس په اړه ډیر ځواکمن وي.
3. کوچنیان مو د احساساتو د ښکاره کولو په تړاؤ و روزئ. هغوي سره د هغوي احساساتو په اړه وغږیږئ، ترې واورئ. مثبت احساساست يې وستایئ، منفې يې ور په ګوته او ترې د خلاصیدا مشورې ورکړئ. دا په ور په ډاګه کړئ چې فکري احساس طبیعي پدیده ده؛ خو ډیر ځواکمن هغه دی چې د ښه مدیریت ډیر توان يې ولرئ.
4. کوچنیان مو د ستونځو په هوارۍ او ترې د را وتو برخه کې و روزئ. کوچنیانو ته د عمر په تیریدو د را ولاړیدونکو ستونځو په تړاؤ خبر ورکړئ او ورته مهال کې يې د مدیریت او د ښه راوتو په اړه لارښوونې وکړئ. د ستونځو په هوارۍ کې ورسره د ملګري په ډول مرسته وکړئ او احسان پرې مه ور باروئ.
5. کوچنیان مو له بې ځایه انديښنو او ترینګلتیاو لیرې وساتئ. د کوچنیوالي په مهال کورنۍ ستونځې، جنجالونه، کیلوالي شخړې او تربګنۍ هغه څه دي چې کوچنیان له وړوکوالي منفي فکره روزي. دا منفي روزنه نه دا چې یاد حالت د لا ورانۍ لامل ګرځي بلکې تر څنګ يې د ژوند په نورو چارو کې نار ارامه او احساساتي لویوي.
6. کوچنیان مو په مثبتو ښکیلتیاوو او تمرینونو کې و روزئ. له کوچنیوالي فزیکي تمرین، د مناسب خوړو او پوره خوب ترسره کولو باندې عادي کړئ.
7. کوچنیان مو نوښتګر و روزئ. هفوي ته د نوښتونو په پنځولو او پکې د ښکیلتیا وخت ورکړئ. د بیلګې په توګه، شاعري، لوبې، موسیقي، لیکوالي، رسامي، تمثیل او ورته نور داسې نوښتګر کارونه چې د انسان هنري ځواک را برسیره کوي.

د دې سربیره کوچنیان مو تر ټولو نیږدې ملګري وګرځوئ. هغي سره ستاسي ملګرتیا، نه دا چې تاسي د هغه له ستونځو، احساساتو او غوښتنو خبروي بلکې تاسي په ډیره آسانه او ښه ډول کولی شي چې هغه له منفي خواوو سم لور ته را وګرځوئ.